Mahashivratri 01 March 2022

✨🔱° ಮಹಾ ಶಿವರಾತ್ರಿ°🔱✨

ದಿನಾಂಕ : 01.03.2022 ಮಂಗಳವಾರ ಮಹಾ ಶಿವರಾತ್ರಿ. ಶ್ರೀ ಮಂಗಳಾದೇವಿ ಅಮ್ಮನಿಗೆ ‘ಅರ್ಧನಾರೀಶ್ವರ/ರಿ ಅಲಂಕಾರ.’

“ಶಿವಂ ಭದ್ರಂ ಕಲ್ಯಾಣಂ ಮಂಗಳಂ ಶುಭದಂ” ಎಂದಿದೆ ಅಮರಕೋಶ. ಭಕ್ತರ ಕೋರಿಕೆಯಂತೆ ಮನೋಭಿಷ್ಟ ಸ್ವರ್ಗ ಮೋಕ್ಷವನ್ನು ಕರುಣಿಸುವವ ಉಮಾಮಹೇಶ್ವರ ಸರ್ವ ಜಗದ್ವ್ಯಾಪಿಯಾದ ಸತ್ಯಶುದ್ಧ-ಚೈತನ್ಯ ಶಾಂತ ಸ್ವರೂಪಿಯೇ ಪರಮೇಶ್ವರನು. ಜಗತ್ತಿನ ಸಮಸ್ತ ಜೀವರಾಶಿಗಳಿಗೆ ಶಿವನೇ ಆಧಾರ ಭೂತನು. ಸಂಕಲ್ಪ ಮಾತ್ರದಿಂದಲೇ ಸೃಷ್ಠಿ ಸ್ಥಿತಿ ಲಯವನ್ನು ಉಂಟುಮಾಡುವ ಸಾಮರ್ಥ್ಯ ಹೊಂದಿರುವ ಶಿವನು ಸರ್ವ ವ್ಯಾಪಕ ಹಾಗು ಸರ್ವ ಶಕ್ತ್ಯನು.

ಈಶ್ವರನಿಲ್ಲದೆ ಇಷ್ಟಾರ್ಥ ಸಿದ್ಧಿಸದು, ಭವನಿಲ್ಲದೆ ಭಾಗ್ಯದೊರಕದು. ಸಕಲ ಸೌಭಾಗ್ಯಗಳಿಗೂ ಶಿವನ ಕೃಪೆಯೇ ಕಾರಣ. ‘ಶಿವ’ನೆಂದರೆ ಮಂಗಳನೆಂದೇ ಅರ್ಥ. ಈಶ್ವರ, ಮಹಾದೇವ, ವಾಮದೇವ, ಶಂಕರ, ರುದ್ರ, ಸದ್ಯೋಜಾತ ಹೀಗೆ ಅಸಂಖ್ಯಾತ ನಾಮಗಳಿಂದ ಕರೆಯಲ್ಪಡುವ ಈಶ್ವರ ದೇವರ ಶಿವಾನುಗ್ರಹದಿಂದಲೇ ಇಹ- ಪರದಲ್ಲಿ ಸುಖ ಶಾಂತಿ ಕೀರ್ತಿ ಸಂಪತ್ತುಗಳು ಪ್ರಾಪ್ತವಾಗುವುದು.

🌸✨”ಶಿವಃ ಶೇತೇ ಅನೇನ ಅಸ್ಮಿನ್ವಾ
ಶಿವಮಸ್ಯಾಸ್ತೀತಿ
ಶಿವಯತೀತಿ ಶಿವಃ..✨🌸

ಅರ್ಥಾತ್ ಶಿವ ಎಂಬ ದಿವ್ಯ ನಾಮವು ಸಕಲ ಕಲ್ಯಾಣ ಗುಣಗಳ ಪ್ರತೀಕ. ಮಂಗಳಪ್ರದವು ಶುಭಪ್ರದವೂ ಆದ ಅದ್ವಯ ಅಂಕಿತವು ಸರ್ವ ಕಾಲದಲ್ಲೂ ಕಲ್ಯಾಣಕಾರಕವಾಗಿಯೆ ಇಹುದು. ಇದು ಶ್ವಃಶ್ರೇಯಸ, ಶುಭಮಯ ಮತ್ತು ಕ್ಷೇಮಕಾರಕ. ಅಜ್ಞಾನವನ್ನು ಅಳಿಸಿ ಸುಜ್ಞಾನವನ್ನು ಬೆಳಗಿಸುವ ದಯಾಸಿಂಧು ಕೈಲಾಸವಾಸಿ ಪರಮೇಶ್ವರನು.

ತನ್ನ ನಂಬಿ ಬಂದ ಭಕ್ತರ ಅಭೀಷ್ಟಗಳಿಗೆ ಎಂದಿಗೂ ನಿರಾಸೆ ಮಾಡದ ‘ನಂದಿ ವಾಹನ’ನನ್ನು ಶೃದ್ಧಾ ಭಕ್ತಿ ಪೂರ್ವಕವಾಗಿ ದಿನವಿಡೀ ಉಪವಾಸಾದಿ ಜಾಗರಣೆಗಳಿಂದ ಪೂಜಿಸಿ ಆರಾಧಿಸುವ ಪುಣ್ಯ ದಿನವೇ ‘ಮಹಾ ಶಿವರಾತ್ರಿ’.
ಕೈಲಾಸವಾಸಿ ಪರಮೇಶ್ವರನಿಗೆ ಶಿವರಾತ್ರಿ ಅತ್ಯಂತ ಪ್ರಿಯವಾದ ದಿನ.

ಭಕ್ತಿ, ಶ್ರದ್ಧೆಯಿಂದ ಉಪವಾಸಾದಿ ಜಾಗರಣೆಯ ಮೂಲಕ ನಮ್ಮನ್ನೇ ನಾವು ಪರಮೇಶ್ವರನಿಗೆ ಅರ್ಪಿಸಿ ಕೊಳ್ಳುವ ಒಂದು ಪರಮ ಪವಿತ್ರವಾದ ದಿವಸ ಮಹಾ ಶಿವರಾತ್ರಿ.
ಶಿವರಾತ್ರಿಯ ಪೂಜಾ ಫಲವನ್ನು’ಸ್ಕಾಂದಪುರಾಣ’ ದಲ್ಲಿ ಈ ರೀತಿಯಾಗಿ ತಿಳಿಸಾಗಿದೆ.

ಮಾಘೇ ಕೃಷ್ಣ ಚತುರ್ದಶ್ಯಾಂ ಯಃ ಶಿವಂ ಸಂಶಿತವ್ರತಃ । ಮುಮುಕ್ಷುಃ ಪೂಜಯೇನ್ನಿತ್ಯಂ ಸ ಲಭೇದೀಪ್ಸಿತ ಫಲಮ್।।

ಅರ್ಥಾತ್ ಮಾಘ ಮಾಸದ ಕೃಷ್ಣ ಪಕ್ಷದ ಚತುರ್ದಶಿಯ ದಿನ ಯಾರು ಕಠಿಣವಾದ ಸಂಕಲ್ಪದಿಂದ ಮೋಕ್ಷಾಪೇಕ್ಷಿಯಾಗಿ ಪರಶಿವನನ್ನು ಪೂಜಿಸುತ್ತಾರೋ ಅವರು ಬಯಸಿದ ವಾಂಛಿತ ಫಲವನ್ನೇಲ್ಲಾ ಪಡೆಯುತ್ತಾರೆ ಎಂದು ತಾತ್ಪರ್ಯ!.

ಪ್ರತೀ ಸಂವತ್ಸರದ ಶಿಶಿರ ಋತುವಿನ, ಮಾಘ ಮಾಸ, ಕೃಷ್ಣಪಕ್ಷದ ಚತುರ್ದಶಿಯಂದು ಶಿವರಾತ್ರಿಯನ್ನು ಆಚರಿಸಲಾಗುತ್ತದೆ. ಮಾಘ-ಫಾಲ್ಗುಣ ಮಾಸಗಳ ನಡುವೆ ಬರುವ ಕೃಷ್ಣ ಚತುರ್ದಶಿಯ ದಿನವೇ ‘ ಮಹಾಶಿವರಾತ್ರಿ’.

ಶಿವರಾತ್ರಿಯು ‘ಶಿಶಿರ ಋತುವಿನ ಫಾಲ್ಗುಣ (ಮಾಘ) ಮಾಸದ ಕೃಷ್ಣಪಕ್ಷ ಬಹುಳ ಚತುರ್ದಶಿಯಂದು ಕೂಡಿ ಬರುತ್ತದೆ. ‘ತಮಸೋಮ ಜ್ಯೋತಿರ್ಗಮಯ’ ಎನ್ನುವಂತೆ ಅಜ್ಞಾನದಿಂದ ಸುಜ್ಞಾನದತ್ತ ತಮಸ್ಸಿನಿಂದ ಬೆಳಕಿನತ್ತ ಒಯ್ಯುವ ಇದೇ ಶಿವರಾತ್ರಿಯ ಪ್ರಸನ್ನ ಕಾಲವು ನಾಳಿನ ಗುರುವಾರದಂದು ಸನ್ನಿಹಿತಗೊಂಡಿದ್ದು ಎಲ್ಲೆಡೆ ಕರುಣಾಮಯನಾದ ಶ್ರೀ ಮಂಜುನಾಥ ಸ್ವಾಮಿಯನ್ನು ಭಕ್ತಿಯಿಂದ ಪ್ರಾರ್ಥಿಸಿ ಆರಾಧಿಸಲಾಗುತ್ತದೆ.
ದುಃಖವನ್ನು ನೀಗಿಸಿ ಸುಖದ ಫಲವನ್ನು ನೀಡುವ ರಾತ್ರಿಯೇ ಶಿವರಾತ್ರಿ ಎಂದರೆ ತಪ್ಪಾಗದು.

ಇದೇ ಪ್ರಯುಕ್ತ ಭಾರ್ಗವ ಪ್ರತಿಷ್ಟಿತ ಕ್ಷೇತ್ರವಾದ
ಶ್ರೀ ಮಂಗಳಾದೇವಿ ದೇವಸ್ಥಾನದಲ್ಲಿ ಮಹಾ ಶಿವರಾತ್ರಿಯ ಸಂಭ್ರಮವು ಮೇಳೈಸಲಿದೆ.
ವಿಶೇಷವಾಗಿ ನಾಳಿನ ದಿನದಂದು ಮಂಗಳಮ್ಮನನ್ನು ಅರ್ಧನಾರೀಶ್ವರ/ಅರ್ಧನಾರೀಶ್ವರಿ ಅಲಂಕಾರದಲ್ಲಿ ಕಣ್ತುಂಬಿಕೊಳ್ಳಬಹುದು.😍

ಪ್ರಧಾನವಾಗಿ ಶ್ರೀ ಕ್ಷೇತ್ರದಲ್ಲಿ ದೇವಿಯನ್ನು ಶಿವಶಕ್ತಿ ಸ್ವರೂಪದ ಲಿಂಗರೂಪದ ಬಿಂಬದಲ್ಲಿ ನಂಬಿಕೊಂಡು ಬಂದು ಪೂಜಿಸಲಾಗುತ್ತದೆ. ಶ್ರೀ ದೇವಿಯು ಶಿವ ಸಮೇತಳಾಗಿ ಬಿಂಬ ರೂಪದಲ್ಲಿ ಶಿವನ ಅಧಿಷ್ಟಾನದೊಂದಿಗೆ ನೆಲೆಸಿರುವಳು ಎಂಬ ನಂಬಿಕೆ. ಇದೇ ಪ್ರಕಾರವಾಗಿ ತಾಯಿಗೆ ನಡೆಯುವ ರುದ್ರಾಭಿಷೇಕ ಸೇವೆ, ಪ್ರಾತಃಕಾಲದ ಪ್ರತಿನಿತ್ಯ ಅಭಿಷೇಕದ ಸಂದರ್ಭದಲ್ಲಿ ಬಿಂಬದ ಮೇಲ್ಭಾಗದಲ್ಲಿ ಕಂಡುಬರುವ ‘ಧಾರಾಪಾತ್ರೆ’ ಮುಂತಾದ ಅಂಶಗಳು ನಂಬಿಕೆಗೆ ಮಗದಷ್ಟು ಪುಷ್ಟಿ ನೀಡುತ್ತವೆ.

ಪೌರಾಣಿಕವಾಗಿ ಅರ್ಥೈಸ ಬಹುದಾದರೆ ಪ್ರಧಾನವಾಗಿ ಶ್ರೀ ದೇವಿಯ ಉಲ್ಲೇಖ ಕಂಡುಬರುವುದು
‘ಭಾರದ್ವಾಜ ಸಂಹಿತೆಯ ಶ್ರೀ ಕದಲೀ ಮಂಜುನಾಥ ಮಹಾತ್ಮೆಯಲ್ಲಿ. ಇದನ್ನು ಭಾರದ್ವಜ ಮುನಿಗಳು ತಮ್ಮ ಶಿಷ್ಯರಲ್ಲೊಬ್ಬನಾದ ಸುಮಂತುವಿಗೆ ಹೇಳಿರುವುದರಿಂದ ಈ ಸಂಹಿತೆಗೆ ‘ಭಾರದ್ವಾಜ ಸಂಹಿತೆ’ ಎಂಬ ಈ ನಾಮವು ಅನ್ವರ್ಥವಾಗಿ ಬಂದಿದೆ.

‘ಓಂ ನಮೋ ಭಗವತೇ ಮಂಜುನಾಥಯ’ ಎಂಬ ಏಕಾದಶಾಕ್ಷರಿ ಮಂತ್ರ ಸಿದ್ಧಿಯಿಂದ ಭಾರ್ಗವ ರಾಮನು ಪರಶಿವನನ್ನು ಒಲಿಸಿಕೊಂಡನು.

ಭಕ್ತರ ಇಷ್ಟಾರ್ಥವನ್ನು ಪೂರೈಸಲು ಭಕ್ತಿಗೆ ಒಲಿದುಕೊಳ್ಳುವ ದೇವದೇವ ಮಂಜುನಾಥೇಶ್ವರನು ಕದಲೀ ವನ ಮಧ್ಯದಲ್ಲಿರುವ ರಸಕೂಪದಲ್ಲಿ ಉದ್ಭವ ಜ್ಯೋತಿರ್ಲಿಂಗ ಸ್ವರೂಪನಾಗಿ ಅವತರಿಸಲು ಹಾಗೂ ಮಂಜುನಾಥನು ನೆಲೆಸಿರುವ ಕದಲೀವನದ ಸಮೀಪದ ದಕ್ಷಿಣ ದಿಕ್ಕಿನಲ್ಲಿ ಮಂಗಳಾಂಬಿಕೆಯ ಪ್ರಾದುರ್ಭಾವದ ಕುರಿತಾದ ಈ ಲೀಲೆಯೇ ಕದಲೀ ಕ್ಷೇತ್ರ ಮಹಾತ್ಮೆಯಾಗಿದೆ.

ಇತ್ಯುಕ್ತ್ವಾತೇನ ರೂಪೇಣ ತತ್ರೈವಾಸ್ತೇ ಮಹೇಶ್ವರಃ|
ಪ್ರೀತ್ಯರ್ಥಂ ಭಾರ್ಗವಸ್ಯಾಸ್ಯ ಲೋಕಾನಾಂ ಹಿತಕಾಮ್ಯಯಾ’ ಎಂದು ಮಹಾತ್ಮೆಯಲ್ಲಿನ ೧೦’ನೇ ದಶಮೋಧ್ಯಾಯದಲ್ಲಿ ಉಲ್ಲೇಖಿಸಲ್ಪಟ್ಟಿರುವಂತೆ ಮಂಜುನಾಥನಿಗೆ ಈ ಕದಲೀ ಸ್ಥಾನವೇ ತನ್ನ ಎಲ್ಲಾ ಸ್ಥಾನಗಳಿಗಿಂತಲೂ ಉತ್ತಮವಾದುದೆಂದು, ಮಂಜುನಾಥನು ಭಾರ್ಗವನ ಪ್ರೀತಿಗಾಗಿ ಲೋಕೋದ್ಧಾರಕ್ಕಾಗಿಯು, ಭಕ್ತರ ಹಿತಕ್ಕಾಗಿಯೂ ರಸಕೂಪದಲ್ಲಿ ಉದ್ಭವ ಲಿಂಗದಲ್ಲಿ ಐಕ್ಯನಾಗಿರುತ್ತಾನೆ.
ದೇವನ ಆಜ್ಞಾನುಸಾರ ಸಪ್ತಕೋಟಿ ಮಂತ್ರಗಳು ಕ್ಷೇತ್ರದಲ್ಲಿ ಸಪ್ತತೀರ್ಥಗಳಾಗಿ ನೆಲೆಸಿದವು.

ಆ ರಸಕೂಪವನ್ನು ನೋಡಿದ ಮಾತ್ರದಿಂದಲೇ ಅಷ್ಟಲೋಹವನ್ನು ಕಾಂಚನವನ್ನಾಗಿ ಮಾಡುವ ಲೋಹ ಸಿದ್ಧಿಯೂ, ದರ್ಶನ ಮಾತ್ರದಿಂದಲೇ ಅಜರಾಮರವಾದ ದೇಹಸಿದ್ಧಿಯೂ ರಸಕೂಪದ ವೈಶಿಷ್ಟ್ಯ, ಅಂತಹ ರಸಕೂಪದಲ್ಲಿ ಪರಶಿವನು ಅವತರಿಸಲು ದೇವಿ ಮಂಗಳೆಯು ಶಿವ ಸಮೇತಳಾಗಿ ತಾನೂ ಇಲ್ಲಿಯೇ ನೆಲೆಸಿದಳು…ಎಂಬುವುದು ಮಹಾತ್ಮೆಯಲ್ಲಿನ ೧೨’ನೇಯ ದ್ವಾದಶೋಧ್ಯಾಯದಲ್ಲಿ ಚರಣದ ೪’ ಶ್ಲೋಕದ ಸಾಲುಗಳಲ್ಲಿ ಮನೋಜ್ಞವಾಗಿ ಉಲ್ಲೇಖಿತವಾಗಿದೆ.

ಅಥ ತೌಳವ ದೇಶಸ್ಯ ಪ್ರಶಸ್ತೀಂ ನಾಮ ವೈ ಪುರೀಂ |
ಶ್ರುತ್ವಾ ತತ್ರ ಧೃತಿ ಚಕ್ರೇ ಮಂಗಲಾ ವಿಂಧ್ಯವಾಸಿನೀ ||
ಅಲೋಕ್ಯ ತೌಳವೀಂ ಭೂಮಿ ಮಖಿಲಾನನಗೃಹ್ಣತೀ |
ಕದಲೀವನ ಪರ್ಯಂತೇ ದಕ್ಷಿಣೇ ವಿಧದೇ ಸ್ಥಿತಿಮ್||

ಪರಶಿವನ ಆಜ್ಞೆಯಂತೆ ಸಹ್ಯಾದ್ರಿಯಿಂದ ಹತ್ತು ಯೋಜನ ದೂರದಲ್ಲಿರುವ ಕದಲೀ ವನವೂ, ಅದರ ಮಧ್ಯ ಭಾಗದಲ್ಲಿ ರಸಕೂಪವೂ ಗೋಚರಿಸುವುದರೊಂದಿಗೆ ಉದ್ಭವ ಲಿಂಗ ಸ್ವರೂಪದಲ್ಲಿ ಪರಶಿವನು ಮಂಜುನಾಥನಾಗಿ ಭಾರ್ಗವ ರಾಮನಿಗೆ ಒಲಿದನು. ಶಿವನ ಆಜ್ಞಾನುಸಾರ ಭಾರ್ಗವ ರಾಮನು ದೇವ ಶಿಲ್ಪಿಯಾದ ‘ವಿಶ್ವ ಕರ್ಮನಿಂದ’ ಮಂಜುನಾಥ ಸ್ವಾಮಿಗೆ ಸುಂದರವಾದ ದೇವಾಲಯವನ್ನು ನಿರ್ಮಾಣ ಮಾಡಿದನು. ನೇತ್ರಾವತಿಯ ಪವಿತ್ರ ಜಲ ಸೇಚನದಿಂದ ಪರಿಶುದ್ಧವೂ ಧನಧಾನ್ಯ ಸಮೃದ್ಧಿಯುಕ್ತವಾಗಿ ಸಕಲ ವೈಶಿಷ್ಟ್ಯಗಳಿಂದ ಶೋಭಿಸಲ್ಪಡುವ ತೌಳವ ದೇಶಕ್ಕೆ ಅನುಗ್ರಹಿಸಬೇಕೆಂಬ ಇಚ್ಛೆಯಿಂದ ದೇವದೇವನ ಅರ್ಧಾಂಗಿಯಾದ ಪರಶಿವೆಯೂ ಈ ಕ್ಷೇತ್ರದಲ್ಲಿ ಅನುಗ್ರಹಿಸಿ ನೆಲೆಸಲು ಸನ್ನದಳಾಗಿ ವಿಂಧ್ಯಾಂಚಲ ವಾಸಿನಿಯಾದ ಲೋಕ ಪಾವನೆಯಾದ ಶ್ರೀ ಮಂಗಳಾದೇವಿಯು, ಕಲಿಯುಗದ ಪ್ರಥಮ ಪಾದದ ಆದಿಭಾದಲ್ಲಿ ದ್ವಿ-ಬಾಹು ಸಮೇತ ಸ್ತ್ರೀಯಾಕಾರದ ಶಿವಶಕ್ತಿ ಬಿಂಬ ಸ್ವರೂಪದಲ್ಲಿ ಸಹ್ಯಾದ್ರಿಯ ದಕ್ಷಿಣ ಭಾಗ(ಬಲ ಭಾಗ)ದ ಸಾಗರ ತೀರದ ಭೂ ಖಂಡದಲ್ಲಿ ಭಾರ್ಗವ ರಾಮನಿಗೆ ಒಲಿದಳು ಎಂಬುವುದಾಗಿ ತಾತ್ಪರ್ಯ.

ದದರ್ಶದೇವದೇವೇಶೀಂ ದೇವೀಂ ದಿವ್ಯ ಸ್ವರೂಪಿಣೀಂ | ಸಹಸ್ರಾದಿತ್ಯ ಸಂಕಾಶಂ ಸಚ್ಚಿದಾನಂದ ವಿಗ್ರಹಾಂ, ದೃಷ್ಟ್ವಾನ ನಾಮ ಪದಯೋ: ದೇವ್ಯಾ: ಸಭೃಗುನಂದನಃ||
ಭ.ಸಂ.ಅ ೧೨ ಶ್ಲೋ.೨೫

ಜಯದೇವಿ ಮಹಾದೇವಿ ಜಯೇಶ್ವರಿ ಮಹೇಶ್ವರಿ | ಜಯಶಕ್ತೇ ಜಯವ್ಯಕ್ತೇ ಜಯಭಕ್ತೇ ನಮೋನಮಃ || ತ್ವಂ ಮಾತ ಸರ್ವ ಲೋಕಾನಾಂ ಆದಿ ದೇವಿ ಶಿವಾತ್ಮಿಕೆ| ತ್ವಮೇವ ಶರಣಂ ಮಾತಃ ಸ್ಥಾವರಸ್ಯ ಚರಸ್ಯಚ || ಶರಣಂತ್ವಾಂ ಪ್ರಪನ್ನೋಸ್ಮಿ ರಕ್ಷಮಾಂ ಮಂಗಲೇಶ್ವರಿ | ಇತಿಸ್ತುತ್ವಾ ಜಾಮದಗ್ನ್ಯ ಹರ್ಷಗದ್ಗ ದಯಾಗಿರಾ | ವ ವಂದೇ ಮಂಗಲಾಂ ದೇವಿ ಮಂಗಲಾಂಗೀ ಪುನಃಪುನಃ ಭ.ಸಂ.ಅ ೧೨ಶ್ಲೋ.೩೨

ಸಂಹಿತೆಯ ಪ್ರಕಾರ “ಹೀಗೆ ತನಗೊಲಿದ ವಿಜಯೀ’ಸ್ವರೂಪಿ ದೇವದೇವೇಶಿ’ಯೂ ಸಹಸ್ರ ಸೂರ್ಯ ಪ್ರಕಾಶೆಯಾಗಿ ಸರ್ವಾಲಂಕರ’ಯುಕ್ತಳಾಗಿ ಪ್ರತ್ಯಕ್ಷಳಾದ ಸಾಕ್ಷಾತ್ ಮಂಗಳಾದೇವಿಯನ್ನು ಕಂಡುತನ್ನ ಸಂತೋಷಕ್ಕೆ ಪಾರವೇಯಿಲ್ಲ ವೆಂಬಂತೆ ಭಾರ್ಗವನು ತಾಯಿಯನ್ನು ಸ್ತುತಿಸಲಾರಂಭಿಸಿ, ಸರ್ವೋತ್ಕರ್ಷವನ್ನು ಹೊಂದಿರುವ, ಸರ್ವಲೋಕಗಳಿಗೂ ಜನನಿಯಾಗಿರುವ ಲೋಕ ಶರಣ್ಯಳಾದ ಜಗದಂಬೆ ಮಂಗಳೇಶ್ವರಿಗೆ ತಾನು ಸೃಷ್ಟಿಸಿದ ಈ ತೌಳವ ಭೂಮಿಯಲ್ಲಿ ಕಲ್ಪಾಂತರ ಅಂತ್ಯ ಪರ್ಯಂತ ನೆಲೆಸಿ ಉದ್ಧರಿಸಬೇಕೆಂದು ಪ್ರಾರ್ಥಿಸುತ್ತಾ ಆ ಮಂಗಳಾಂಗಿಯ ಚರಣಾರವಿಂದಗಳಿಗೆ ಪುನಃಪುನಃ ಸಾಷ್ಟಾಂಗ ಪ್ರಣಾಮವನ್ನು ಮಾಡುತ್ತಾನೆ. ಭಾರ್ಗವನ ಸ್ತುತಿಯಿಂದ ಸಂತುಷ್ಟಳಾದ ಮಂಗಳಾಂಭೆಯು ಇಂತೆಂದಳು.

ವತ್ಸ! ತ್ವದ್ಭಕ್ತಿಯುಕ್ತಾರ್ಧಾ ಮಂಜುನಾಥ ಪ್ರಸಾದಿನಿ| ನಿವಸಾಮ್ಯತ್ರ ಸುಖಿನೀ ಸಹ ನಿತ್ಯ ಮಹೋತ್ಸವಾ ಉಪಾರೈರಮೋಘಾರ್ಥೈಃ|| ಯೇ ಮಾ ಮತ್ರತ ಮಾನವಾಃ ಪೂಜಯಂತ್ಯೇವಮೇತೇಭ್ಯೋದದಾಮಿ ಮಹತೀಂ ಶ್ರೀಯಂ ತ್ವಮಪ್ಯಾವ್ಯಾಹತೈಶ್ವರ್ಯಃ ಸರ್ವೇಷಾಮುಪರಿಸ್ಥಿತಃ ನಿತ್ಯಶುದ್ಧೋನಿರಾಯಾಸೋ ನಿವೃತೋಭಾವ ಭಾರ್ಗವ||
ಭ.ಸಂ.೨೭ ಶ್ಲೋ.೩೯

ಭಾರ್ಗವನ ಭಕ್ತಿಗೆ ಮೆಚ್ಚಿ ದೇವಿಯು ” ವತ್ಸಾ, ಮಂಜುನಾಥನ ಒಡಗೂಡಿ, ಮಂಗಳಾದೇವಿ ಎಂಬ ನಾಮಧೇಯದೊಂದಿಗೆ ಮಂಜುನಾಥ ಸ್ವಾಮಿಯ ಸಹಿತ ತನ್ನ ಚೈತನ್ಯದ ಸಾನಿಧ್ಯವು ಶಾಶ್ವತವಾಗಿ ಲಿಂಗರೂಪದಲ್ಲಿ ನೆಲೆಸಿರುವುದಾಗಿಯೂ, ಯಾರು ತನ್ನನ್ನು ಶೃದ್ಧಾ ಭಕ್ತಿಯಿಂದ ವಿದ್ಯುಕ್ತವಾಗಿ ಪೂಜಿಸಿ ಫಲಾಪೇಕ್ಷೆಯೊಂದಿಗೆ ಬರುತ್ತಾರೋ, ಅಂತಹ ಭಕ್ತರಿಗೆ ಸಕಲ ಸಂಪತ್ತುಗಳನ್ನು ನಿರಂತರವಾಗಿ ಅನುಗ್ರಹಿಸಿ, ನಿತ್ಯ ಉತ್ಸವಾದಿ ಮಹೋತ್ಸವಾದಿಗಳಿಂದ ಕಲ್ಪಾಂತ್ಯ ಪರ್ಯಂತ ಮೆರೆಯಲ್ಪಡುವೆನು”. ಎಂದು ಭಾರ್ಗವ ರಾಮನಿಗೆ ವಚನವನ್ನಿತ್ತು ಅಂತರ್ಧಾನಳಾಗಿ, ಲಿಂಗರೂಪದಲ್ಲಿ ಒಲಿದಳು. ಅನಂತರ ಸರ್ವವಂದಿತೆಯಾದ ದೇವಿಯ ಆಜ್ಞೆಯಂತೆ ಆಕೆಗೆ ದೇವಾಲಯವನ್ನು ನಿರ್ಮಿಸಿ ಲಿಂಗರೂಪದ ಶಿವಶಕ್ತಿ ಬಿಂಬವನ್ನು ಪ್ರತಿಷ್ಟಾಪಿಸಿದನು.

ಹೀಗೆ ಮಂಜುನಾಥ ಮಂಗಳಾಂಬಿಕೆಯಿಂದ ವಿಶೇಷ
ವರ ಪ್ರಧಾನ ಪಡೆದ ತೌಳವ ದೇಶವು, ಮಂಗಳಾದೇವಿ ದೇವಸ್ಥಾನದಿಂದ ಪ್ರಾರಂಭವಾಗಿ ಕದಲೀ ಕ್ಷೇತ್ರದ ಭರದ್ವಾಜಾಶ್ರಮದ ವರೆಗೆ ವಿಸ್ತಾರವುಳ್ಳದಾಗಿದ್ದು ಪಡುಗಡಲ ದಡದವರೆಗೆ ಬಹು ಸುಭೀಕ್ಷೆಯಿಂದ ಬೆಳೆಯತೊಡಗಿತು. ಮಂಜುನಾಥ ದೇವರು ತೌಳವಾಧಿಪತಿಯಾಗಿ ಅಧಿಪತ್ಯವನ್ನು ವಹಿಸಲು, ಮಂಜುನಾಥನ ಪಟ್ಟದರಸಿಯಾಗಿ ಮಂಗಳಾಂಭೆಯು ನೆಲೆಸಲು, ದೇವಿಯ ಸಂಪೂರ್ಣ ಕೃಪಾಕಟಾಕ್ಷದಿಂದ ಮಂಗಳಾಪುರವಾಗಿ ಇಂದು ಸುಖ ಶಾಂತಿ ನೆಮ್ಮದಿ ಉತ್ತಮವಾದ ಬಾಳ್ವೆಗೂ ಮೂಲ ಸ್ಥಾನವಾದ ಮಹಾ ನಗರಿಯಾಗಿ ಬೆಳೆದು, ತೌಳವ ದೇಶದ ತಿಲಕಾಯಮಾನವಾದ ಮಂಗಳಾಪುರವೆಂದು ಪ್ರಸಿದ್ಧಿ ಪಡೆಯಿತು.👏

ಆದ್ದರಿಂದ ನಾಳಿನ ಶಿವರಾತ್ರಿಯ ಶುಭ ದಿನದಂದು
ಅರ್ಧನಾರೀಶ್ವರ/ರೀ ಅಲಂಕಾರದಲ್ಲಿ ಶಿವ ಸಮೇತ ಪ್ರಸನ್ನಿತಳಾಗಿ ಮೆರೆಯಲ್ಪಡತಕ್ಕಂತಹ ಮಂಗಳಾಂಭೆಯ ಮೇರು ವೈಭವವನ್ನು ಕಂಡು ಧನ್ಯರಾಗುವ ಸೌಭಾಗ್ಯ ನಮ್ಮನಿಮ್ಮೆಲ್ಲರದು.

ಸೃಷ್ಟಿ ಕರ್ತ ಹಾಗು ಸೃಷ್ಟಿ ಎರಡೂ ಒಂದೇ ಎಂಬುದೆ ಅರ್ಧನಾರೀಶ್ವರ ತತ್ವ. ಶಿವ ಹಾಗು ಶಕ್ತಿ ಒಂದೇ ಶರೀರದಲ್ಲಿ ಒಂದಾಗಿರುವ ಸುಂದರ ಸಮಾಗಮ.
ಪಾರ್ವತೀ ಪರಮೇಶ್ವರರ ಪ್ರತ್ಯಕ್ಷ ದರ್ಶನವೆಂಬಂತೆ ಮಹಾದೇವಿಯು ಮಹಾದೇವನ ವಾಮಾಂಗ (ಎಡ)ಭೂಷಿತೆಯಾಗಲು,..ಮತ್ತೊಂದೆಡೆ ಪಾರ್ಶ್ವ(ಬಲ) ಭಾಗದಲ್ಲಿ ಪರಶಿವನು ದೇವಿಯಲ್ಲಿ ಅಂತರ್ಗತನಾಗಿ ಅರ್ಧನಾರೀಶ್ವರನಾದನು.
ಈ ಶಿವ-ಶಕ್ತಿಯರ ಅವಿನಾಭಾವದ ಸಂಯೋಗದ ಸಂಕೇತವೇ ನಾಳಿನ ಶಿವರಾತ್ರಿಯಂದು ವಿಶೇಷವಾಗಿ ವರ್ಷಕ್ಕೆ ಒಂದರಂತೆ ಮಾತ್ರ ಶಿವರಾತ್ರಿಯಂದು ತಾಯಿಗೆ ನಡೆಸುವ ಅರ್ಧನಾರೀಶ್ವರ/ರಿ ಅಲಂಕಾರ ಮಹತ್ವಪೂರ್ಣವೆನಿಸಿದೆ.

ಶಂಕರನು ದಯಾಮಯನು ತನ್ನ ಭಕ್ತರ ಯಾವ ಬೇಡಿಕೆಯನ್ನೂ ನಿರಾಕರಿಸದವನು ಎನ್ನುವ ನಂಬಿಕೆ ನಮಗಿದೆ. ಶಾಸ್ತ್ರಗಳಲ್ಲಿ ಉಲ್ಲೇಖಿಸಿರುವಂತೆ ಶಿವನು ಅಭಿಷೇಕಪ್ರಿಯನು. ಶೃದ್ಧಾ ಭಕ್ತಿಯಿಂದ ಮಾಡುವ ಅಭಿಷೇಕವನ್ನು ಪ್ರೀತಿಯಿಂದ ಸ್ವೀಕರಿಸಿ, ಬೇಡಿದ ವರಗಳನ್ನು ಕ್ಷಣಾರ್ಧದಲ್ಲೇ ಅನುಗ್ರಹಿಪ ಕಾರಣದಿಂದ ಈಶ್ವರನ ಪ್ರೀತ್ಯರ್ಥವಾಗಿ ಶಿವರಾತ್ರಿಯ ಪ್ರಯುಕ್ತ ಪ್ರಾತಃಕಾಲ ದೇವಿಗೆ ರುದ್ರಾಭಿಷೇಕವು ನೆರವೇರಲಿದೆ.

ವರ್ಷವಿಡೀ ಈ ದಿನಕ್ಕಾಗಿಯೇ ಎದುರು ನೋಡಿ ಕಾದು ವರ್ಷಕ್ಕೊಂದು ಬಾರಿ ಮಾತ್ರ ನಮಗೆ ಕಾಣಸಿಗುವ ಅವಿಸ್ಮರಣೀಯ ಕ್ಷಣ ಅದು ಶ್ರೀದೇವಿಗೆ ಮಾಡಲಾಗುವ ಅರ್ಧ ನಾರೀಶ್ವರ/ರಿ ಅಲಂಕಾರ.

ನಾಳಿನ ‘ಅಃತಪಟದ ಪರದೆ’ಯನ್ನು ಸರಿಸುತ್ತಿದ್ದಂತೆಯೇ, ಪಾರ್ಶ್ವ ಭಾಗದಿಂದ ‘ಜಟಾಧರನಾಗಿ’ ಶಿರೋಭೂಷಣವಾಗಿ ಚಂದ್ರನನ್ನು ಧರಿಸಿ, ಪೀತಾಂಬರಯುಕ್ತನಾಗಿ ರುದ್ರಾಕ್ಷಿ ಸಹಿತ ತ್ರಿಶೂಲಧರ ಸಪತ್ನೀ ಸಮೇತನಾದ ಮಂಜುನಾಥ ಸ್ವಾಮಿಯನ್ನೂ…ವಾಮ ಭಾಗದಲ್ಲಿ ಕಪರ್ದಿನಿ’ಯಾಗಿ ಮಂದಸ್ಮಿತಳಾಗಿ ವರದ ಮುದ್ರೆಯ ಹಸ್ತದೊಂದಿಗೆ ಆಶಿರ್ವದಿಸುವ ಮಂಗಳಮ್ಮನನ್ನು ಅರ್ಧನಾರೀಶ್ವರ ಅಲಂಕಾರದಲ್ಲಿ ಕಂಡು ನಮ್ಮ ಜನ್ಮವನ್ನು ಸಾರ್ಥಕಗೊಳಿಸೋಣ.😄

ಮಾತ್ರವಲ್ಲದೆ ಎಂದಿನ ಪ್ರಕಾರ ರಾತ್ರಿ ೮.೩೦’ಗಂಟೆಗೆ ನಿತ್ಯಮಹಾಪೂಜೆಯು ಜರುಗಿದ ಬಳಿಕ ಶಿವರಾತ್ರಿಯ ಪ್ರಯುಕ್ತ ವಿಶೇಷ ಮಹಾಪೂಜೆಯು ೯.’ಕ್ಕೆ ಸರಿಯಾಗಿ ನಡೆಯಲಿದೆ.

ನಮ್ಮ ಪೂರ್ವ ಪುಣ್ಯಾನುಸಾರವಾಗಿ ನಾಳಿನ ಗುರುವಾರ ಲಭಿಸಲಿರುವ ಅವಳ ಮಂಜುನಾಥ ಸ್ವರೂಪ ಅಲಂಕಾರ ದರ್ಶನದಿ ಸರ್ವಾಭೀಷ್ಟಗಳು ಫಲಿಸಲಿ. ತೌಳವ ದೇಶಾಧಿಪನಾದ ಮಂಜುನಾಥನು ಸರ್ವರ ಅಭೀಷ್ಠಗಳನ್ನೆಲ್ಲ ನೆರವೇರಿಸಿ ಸಂಕಷ್ಟಗಳಿಂದ ಪಾರುಮಾಡಿ ಸಂತಸ, ಸಮೃದ್ಧಿಯ ಶಿವರಾತ್ರಿ ಶುಭವನ್ನು ತರಲಿ. ಲೋಕದ ಸರ್ವ ತಾಪತ್ರಯಗಳು ಪರಿಹಾರವಾಗಿ ಸುಖ-ಶಾಂತಿ-ನೆಮ್ಮದಿ ಶಾಶ್ವತವಾಗಿ ನೆಲೆಸಲಿ.

🌹✨°ಶಿವಾರ್ಪಣ ಮಸ್ತು°🌹✨